14 fevral - Müqəddəs Valentin Günü və ya Sevgililər Günü - yəqin ki, hər birimizin həyatında mühüm günlərdən biridir.

Bu gün məhz bütün dünyada sevginin təntənəsinin qeyd olunduğu tarixdir. Fevralın 14-cü günü dinindən, dilindən, irqindən asılı olmayaraq dünyanın bütün xalqları üçün sevgiyə həsr olunmuş ən ali gündür. Burada insanların öz sevgilərinə verdiyi dəyər, sevginin bəşər tarixinin ən müqəddəs hislərindən biri olmasına sonsuz inam öz əksini tapır.

Təəssüf ki, bu günün anlamını dərk edə bilməyən, insanların öz sevgilərinə bircə günü belə həsr etməsini həzm edə bilməyən insanlar da var.

Elə bir vaxtlar 24 saylı Nizami birinci seçki dairəsindən deputatlığa namizəd olmuş, iqtisadçı Qulu İbrahimli də, görünür, 14 fevralın mahiyyətini dərk edə bilməyənlər cərgəsində ön sıralarda dayanmağa iddialıdır.

Əvvəlcə, Qulu İbrahimlinin Sevgililər Günü ilə bağlı təsəvvürlərini ifadə edən sosial şəbəkə hesabında bəh-bəhlə yayımladığı son paylaşımına nəzər salaq:

“Bütün bambılı kişilər bu gün gül mağazalarının qarşısındadır”.

Bəli, Azərbaycan parlamentində xalqın fikirlərini təmsil etmək iddiasına düşmüş şəxsin sevgililər günü ilə bağlı təsəvvürləri məhz belədir… Qulu İbrahimlinin öz sevgisinə dəyər verən insanlara qarşı münasibəti bundan ibarətdir.

Qulu İbrahimlinin cümləsində sevdiyi insan üçün ən azı bir çiçək almaqla öz sevgilərinin gününü qeyd edən kişilərin ünvanına yazılmış sifət ən yüngül halda onları təhqir etmək anlamına gəlir. İqtisadçı hesab edir ki, insanların sevgisi üçün rəmzi məna daşıyan bir günü qeyd etməsi yol verilməzdir.

Üstəlik, sözügedən paylaşımın şərh bölümündə də “bambılı” sözündən daha ağır sifətlərdən istifadə etməyə özündə haqq görür bu şəxs… Utanmadan, sıxılmadan…

“Məşhur” iqtisadçının sevgiyə qarşı bu cür iyrənc yanaşmasının səbəbini anlamaq çox çətindir. Ancaq daha çətin olan onun bu cür cəfəng fikirləri böyük pafosla paylaşacaq dünyagörüşünə sahib olmasıdır. Nəticə isə budur ki, Qulu İbrahimli adlı şəxs həm iyrənc düşüncələri daşıyır, həm də onları cəmiyyət arasında səsləndirməkdən qətiyyən çəkinmir. Bu artıq ən yüngül halda ikiqat “səhv”dir deyə bilərik…

Məqsədi, məramı nə olur olsun, bu cür ifadəyə yol verən şəxs mütləq qaydada cəmiyyətin sərt tənqid oxlarına hədəf olmalıdır. Çünki öz xanımına, nişanlısına, ürəkdən sevdiyi birinə qarşı nəcib hislər bəsləyən, onların sevgisinə ən yüksək dəyəri verən insanların təhqir olunması yolverilməzdir.

Bu cür nalayiq ifadələr, iyrənc düşüncə sahibləri mütləq şəkildə öz düşüncələrinə görə cavab verməlidirlər. Çünki bu gün Qulu İbrahimlinin şəxsində bu düşüncə gələcəkdə onun təsiri ilə başqalarına da sirayət edə, cəmiyyətdə olduqca mənfi tendensiya yarana bilər.

Əgər Qulu İbrahimli sevənlərin bir-birinə verdiyi qiyməti “bambılı”lıq adlandırır, sevgi üçün ayrılmış bircə günü həzm edə bilmirsə, bu çox qorxulu məqamdır.

Kişilərin, eləcə də qadınların öz sevgilərinə həsr etdikləri gün isə onların hər biri üçün hər zaman özəl olaraq qalacaq. Əsas öz sevdiyi üçün gül dəstəsi bir kənara qalsın, ən kiçik bir hədiyyəni almağı düşünəcək qədər gözəl qəlbə sahib insan olmaqdır. Təbii ki, bu düşüncədə ola bilmək üçün də əsas şərt məhz insan olmaqdır…

Sevgi insana bəxş edilmiş ən saf hisslərdən biri, bəlkə də birincisidir. Əgər bu hissi yaşaya, göstərə, dəyər verə bilirsənsə, insan olursan. Sevgisinə dəyər verənlərə xor baxanlara isə ad tapmaq olduqca qəliz məsələdir…